مساء الخير أو صباح الخير على حسب التوقيت إللي بتسمعني فيه، أنا ندى هشام و النهاردة مراجعة فيلم سكاي - سكريبر أو ناطحة السحاب Skyscraper ..

أب ضابط سابق متقاعد بسبب إعاقة جسدية وأم طبيبة جراحة وأولادهم، بيتحبسوا في أعلى مبنى في العالم كله وهو بيتحرق! بيواجه الأب الموت وبيخاطر بكل شئ عشان ينقذ عيلته وينقذ نفسه..

شوف التريلر من هنا:

https://www.youtube.com/watch?v=t9QePUT-Yt8

الفيلم إخراج :

راسون مارشال

الفيلم بطولة :

وبطولة ( دوين جونسون )، و ( نيڤ كامبل )، وناس تانية زي ( تشين هان ) وغيرهم بيعجبني جداً في ( دوين ) إختياره لكل أدواره من ساعة ما دخل مجال التمثيل،

بحس أحياناً أنه كتب الشخصية بنفسه عشان كده دايماً بشوفه مش مجرد ممثل بيلبس شخصية العمل على قد ما بيكون تلقائي.. بيكون نفسه فعلاً وأقدر أقول إن ده سبب نجاح أي عمل لـ (دواين) بالنسبة ليا وده كمان بيخليني أشوفله أي شئ وأنا مغمضة...

أما ( نيڤ ) فهي واحدة من الممثلات القليلات إللي طلتهم بتبقى مريحة على الشاشة عموماً، وسعيدة بمشاركتها في مارثون أفلام 2018.. الفيلم ممكن يكون في المستوى المتواضع أوي، والفكرة نفسها مش جديدة ولا تنفيذها مبدع في أي شئ، والحبكة كمان متواضعة جداً يعني م الآخر سهل أنا شخصياً أكتب قصة زي دي، لكن ماننكرش الهدف المخفي والرسالة المقصودة جوا الأحداث وهو قد إيه العضو أو الطرف الصناعي بيمثل لمتحدي الإعاقة جزء أساسي بيعينهم في حياتهم، وبينقذها أحياناً زي ما شوفنا في الفيلم إن سلاح البطل كان قدمه الصناعية في النهاية وزي ما عودنا (دوين جونسون) فيلم ممتع بين دراما عائلية وأكشن وإثارة.. هتتبسط لما تشوفه حتى لو هحكم إنه خارج ماراثوني الشخصي لأفلام 2018.. هدي الفيلم ٨/١٠ لأني حبيته كليةً، التصوير من زوايا واسعة مريح جداً مش بيخاطر، والموسيقى لطيفة، والإخراج والأداء جيدين جداً.. رغم إن IMDb إدته 6 و rotten tomatoes إدته 47℅ إنتوا كمان شاركوني رأيكم وتعليقكم وتدوا للفيلم كام من عشرة؟! وإيه أكتر المشاهد إللي عجبتكم.. وأرشحلكم rampage من سينما (دوين) للـ 2018 و.... أفوتكم بعافية