ممكن بعد تجربة مؤلمة نمر بيها نبقى خايفين على اللي بنحبهم يمروا بيها , ولمجرد ان اللي كان سبب في التجربة المؤلمة دي شخص او ناس مش كويسين نحكم على باقي الناس او … باقي البشر مش كويسين , زي “دراكولا” في فندق ترانسلفانيا
التجربة اللي مر بيها وخسر فيها مراته من اشخاص مش كويسين من البشر خلته يعتقد ان كل البشر كده وانهم اشرار وده زود خوفه على بنته “ميفيس” وده خلاه يعمل فندق … للوحوش فقط
لخوفه على بنته وخوفه من البشر ; لكن بنته كانت بتحب الاستكشاف  , وكان نفسها تشوف حاجه جديده غير الفندق اللي قاعده فيه
ومع وجود شخص جديد في الفندق كان لازم تعرف هو مين , وهو كان من البشر … لكن “دراكولا” فهمهم غير كده طبعا عشان يحافظ على سمعة الفندق , والمستكشف “جوني” مكنش ينفع يشوف الفندق من غير مايستكشفه ويرضي فضوله , وهو وميفيس حبوا بعض وبعد معاناة ومحاولات فاشلة من “دراكولا” فهم الموضوع وان مش كل البشر مش كويسين وان في ناس ممكن يحبهم ويثق فيهم وانهم اتغيروا عن زمان
و”ميفيس” اتجوزت “جوني” والفندق دلوقتي بقى للبشر والوحوش
انك تمر بتجربة مؤلمة بسبب اشخاص مش كويسين , ده مش معناه انك تحكم على كل الناس انهم زيهم وكمان مش عشان انت خايف على حد بتحبه انك تحبسه ومتخليهوش يشوف حاجه غير الناس اللي يحواليه والمكان اللي عايش فيه بس
الحب مش خوف زيادة , والخوف مش حبس والتجربة الصعبة متخليش حكمك غلط وكل حد واي حاجه فيها الحلو والوحش لكن في الاخر هنعيش مع بعض ونحب بعض
ومنحكمش على حاجه في لحظة غضب وخوف لانك مهما كنت عاقل حكمك مش هيكون صح